‘जनसरकारको निर्णयमा प्रतिपक्ष पनि सहमत’

१६ माघ, गुल्मी । जनयुद्धको समयमा माओवादी जनसरकारले गरेका निर्णय कार्यान्यन गर्न प्रतिपक्ष दलहरु सहमति नजिक पुग्न लागेका खुलासा माओवादी नेताले गुर्नभएको छ ।

क्रान्तीकारी पत्रकार संघ गुल्मीले आज विहान तम्घासमा गरेको पत्रकार सम्मेलनमा बोल्दै एकीकृत नेकपा माओबादीका नेता हेमन्तप्रकाश ओलीले जनसत्ताले गरेका कामहरुलाई बैधानिकता दिन प्रतिपक्ष दलसंगको संवाद सकारात्मक रुपमा अघि बढेको दाबी गर्नुभयो ।

ओलीले अन्य राजनीतिक दलका नेताहरुले बाहिर जे जस्तो विरोधको आवाज आएपनि भित्री रुपमा सहमतीमा आइसकेको दाबी गर्नुभयो ।

आन्तरिक प्रशिक्षण दिन गुल्मी आउनुभएका ओलीले केहि दिनमै राजनीतिक दलहरुकाबीच सहमति हुने विश्वास व्यक्त गर्नुभयो । उहाँले संसद बैठक अवरुद्ध गरिरहेका प्रतिपक्षी दललाई शान्ती र संविधानलाई अवरोध गर्न खोजेको आरोप समेत लगाउनुभयो ।